( تشغلني وتسهرني الليل )
ليه ياقلبي شاكك ان حب حبيبك في قلبه قَلّْ
إوعي يآقلبي أوهامك تخليك تزهق منه أو تِّمِلّْ
وليه تعذبني معاك كل شويه وتشغلني بالأوهام
هو يعني علشان غاب عنك يومين وناسي يبعت حتي السلام
تشغلني وتسهرني الليل وتاعبني معاك ومش مريحنى
و عن هواك في قلبه كل شويه تلعب بأفكاري ومش مطمني
طب ايه رأيك ياقلبي نسيبه شويه هو ومزاجه
ماهو إنت ياقلبى اللي بتحبه ومتعلق بيه ومحتاجه
طب تعالي علشان نرتاح نراقب من سُكات افعاله
ونشوف ايه غيروا وخلاه ينسانا يومين ونتأكد من هواه
ونعرف مين اللي مقسيه علينا وإيه آخرتها معاه
ولو كان للود وللوداد ناسيه ومش هيصونوا
نتعود ياقلبي علي القسيه شويه ونعمل نفسنا ناسينوا
ولما يحس بغلطته ووجعنآ نبين لييه اننا كمان مش فاكرينوا
وعلشان عذبنا ليالي يستاهل كل اللي هايحصلوا
هو فاكر انه لما يغيب علينا ويسبب لينا العذاب هنسيبوا
ياما گان بيقسي علينا وهو معانا وكنا بنتحملوا
وياما جيت عليا ياقلبي وعلي الصبر ياما غصبتني
وبعد القسوه اللي شوفتها منه إنت اللي علمتني
هو ايه اللي كان معلقنا بيه ياقلبي غير حنيته
ولماَّ ظلمنا وجرحنا وشوفنا منه عذاب قسوته
يبقي خلاص ياقلبي نتقل عليه شويه ونعلمه
ونسهروا الليالي زي ماسهرنا وناخد تارنا منه
ونفكره بزمآن لماَّ بيعنا ناس كتيره واشترينا حبه
وبعد ماحبيناه ياقلبي واخلصنالوا نلقاه كده يتغير
ويتسبب لينا في دموع عنينآ ويخلي الفكر معاه يتحير
ليه واحنا دايبين في هواه يخلينا نتعلم فيه القسيه
واحنا اللي طول عمرنا مانعرف غير الحب والحنيه
ياما صبرنا عليه وگان املنا يرجع زي زمآن
وقلبه يرجع طيب علينا ومليان حنيه زي ماكان
ونفضل شارينه وروحنا فيه وساقينه الحنان
لكن وحياة دموعنا اللي غرقت خدودنا لازم نعلمه
وزي ماجرحنا في حبنا نجرحه ونبعد عنه كام يوم وما نكلمه
ونعرفه انه مهما كان الحب كبير القسيه هي اللي بتغيروا
ولو حس بغلطته ورجع ندمان مش هنقدر برضوا نكرهوا
ولو قلبه اتغير زي زمان هنفضل جنبوا مدام الحب هيرجعوا
علشان بنحبه ياقلبي عمرنا ماهنقدر ننساه أو حتي نبعدوا
خواطر...( أشرف الدغيدي )
حقوق الملكية محفوظه
ليست هناك تعليقات:
إرسال تعليق