(
ذكريات جميله )
ذكريات جميله ولسه فاكرها
عن طفوله وكنت عايشها
إزاي انساها وانسي أيامها
أيآم جميله وحلاوتها راحت
وم البوتاجاز معدتنا تاهت
وبعدك يااما قلت راحتي
خدتي الحلو معاكي وروحتي
عارفه نفسي ف إيه دالوقتي
وبقالي سنين مش قادر انساه
وطعم الأكل ما بنلقاه
نفسي اشوفك وانتي بتحشي
إنتي وستي حلة محشي
وتسويها ع الگانون
بجِلّْه وحطب والسوىٰ موزون
وويا المحشي بط مزغط
بقاله شهور عمال يتنطط
ايام حلوه وما بننساها
لما البطه يتم سواها
آخد الكبده وع الكتاب اجري
وانا فرحان ومحدش قدي
والله وگانت احلي ايام
لسه فاكرها ياأمي تمام
وكمان فاكر يوم الخبيز
دايماً گان بيبقي خميس
كنا بناكل ذره مشويه
وندي لجارنا منه شويه
ونسهر يومها للصبحيه
نقزقز لب وفول سوداني
وقصب مخطط وبلح حَيّْاني
حلاوتهم گانت مش معقول
وجوه الفرن دماسة فول
نفطر بيها في الفجريه
والله ياأُمي هف عليا
قشطه بلدي وجبنه قريش
ومشلتت بلدي معاه قراقيش
وعلي صهد النار نشرب شاي
في الخمسينه رايح جاي
وبيوت زمان بالخير مليانه
عيشه تمام وقلوب عمرانه
يصونوا العشره واهل شهامه
ورغم الفقر كان عزة نفس
راضين بحالهم من غير يأس
والأم تعشش وتسند جوزها
گانت تعمل هدومها بإيدها
وتربي كمان من أجل ولادها
فراخ بلدي ورومي وديوكها
وبط ووز وأحلي ارانب
أم وشاطره ماسابت جانب
حتي الغيط كانت بتروحوا
وكمان فاكر رمضان وطقوسوا
وحكايات آخر أياموا
كنا صغار وماكنا نناموا
وفرحه كبيره تِملآ البيوت
ويا الكعك والبسكوت
وغريبه ف حلاوتها تدوب
والعيديه شلن يادوب
وكنا بنفرح بيوم العيد
علشان نلبس لبس جديد
وقازوز ببسي يخرموا مسمار
ومكر الخيط م الخياط
نعمل عجل وعربيات
نجري ونلعب بالمشوار
والرومي ينقرنا بالمنقار
ولسه فاكر شيخ كُتَابنا
والعريف گان بيحفظنا
سور كتيره من القرءآن
ويعلمنا الخط كمان
وجمبه فلكه بتخوفنا
يكتب نقط وحروف ع اللوح
بدواية حبر وقلم بوص
واللي مايعرف ع الفلكه يروح
كنت شاطر وواد خلبوص
وجنب البيت گانت مدرستي
ولما كِبرتٔ جبولي مريلتي
گانت بيج ومن الكتان
وجزمه كان نعلها بوريتان
والله وكانت احلي أيام
خواطر...( أشرف الدغيدي)
حقوق الملكية محفوظه
ليست هناك تعليقات:
إرسال تعليق