مركب ورق
فى فترة من حياتي أعلنت إستسلامى
ورميت سيفى وتركت ميدانى
وطوعت شيطانى ومشيت وراه
مشانى على الطريق حافى
على أرض طارحه شوك
والدنيا ليل ونور القمر طافى
مشيت ع الشوك لأخر الطريق
والطريق في آخره بحر غريق
وعالشط مركب ورق
من اللى شوفته في الطريق
جريت ع المركب فرحان فرحة غريق
نجا من الغرق
نزلت المركب وفضلت اقدف اقدف
وفي عرض البحر فجأه هاج الموج
والمركب غرق
بقيت أعافر مع الموج وأصارع الموت
أصرخ مهما أصرخ محدش سامع صوت
وفى آخر لحظة وخلاص هموت
فجأة سمعت صوت ملاك بينادى
ماتخفش مش هتموت
وكان على ايديها النجاة
خدتنى من الموت لجنة الحياة
ورسمتلى الطريق وحددتلى الأتجاه
وقالتلى انت مش لوحدك أنا معاك
طول ماانتا مع الله
ليست هناك تعليقات:
إرسال تعليق