لوح تلج
...................
وبتسأل !!!
لا متسألش
بطلت أرد على أسئلتك
أدام ما قلتش ازيك وطمني
بتسأل ليه ؟؟
روح أبعد بلاش تسأل
عودت قلبي على بعادك
وداق لوعة الحرمان
كتير منك
مع إنك واخد غرفتين جواه
ساكن يعني ومتمكن
بدون أجره
بدون إحساس
داخل وخارج من بابه
بدون تأشيره تحت سماه
وأنا صابر وأقول يعقل
بس من كتر
ما سمعتك وسامحتك
بقيت في ليلي أقول الآه
وبأعلى صوت جوايا
مش قادر أتحمل
ازاي تكون جوايا
ومش حاسس بوجع قلبي
وكلمه آه بتقطع كل شيئ فيا
بتخرج من ضلوعي نار
بتحرق كل اللي حواليا
ومش سامع ومش شايف
عذاب قلبي
وتقول أغلى ما ليا
ومش حاسس ولا شايف
دموع عيني
وجاي تسأل حبيبي فين
قبل ما تسأل
قول مالك حبيبي طمني
حزين قلبك .وإيه غيبك عني
فداك روحي
كلامك كان يزيل همي
وأرد وأقولك
ليه أنا موجوع
حلمت إنك
تكون أجمل أيامي
وصحيت لقيتني أنا المخدوع
كنت فاكرك تحس بيا
قبل ما أقول الآه
ايوا تحس بيا قبل ما أقولها
مش إنت ساكن جوه قلبي
وكل لحظه معاه
بس ياخساره
لقيت إحساسك نبض بارد
زي إحساس التلج
لما يبقى جوه ميه
كل ماده يزيد بروده
وكل ماده ينقص شويه
إنت زي لوح التلج
جوه قلبي .بردت حبي
وخلتني بدون إحساس
مليش نفس حتى
أقولك سلام
ولا أرد حتى السلام
وبدون كلام
راح أقولك ده الختام
خلاص أنا قلبي مات
اخرج منه وكفايه
اخرج منه وكفايه
...................
بقلمي/حمدي رمضان .ابوعمروالريشي
ليست هناك تعليقات:
إرسال تعليق