صدقني
أيام الدنيا أحلى من أحلام الأغاني
فيها الشارع وبيتنا .. والحب الأولاني
وفيها اتربى قلبي .. في حضن الناس حبايبي
اسمعني ..
حلوة الأحلام حقيقي .. معلهشِ يا حبيبي
لكن مابين طريقي .. وبينها بر تاني
وبحور هايجة وغريقة ..
وأنا مانيش جريئة
والسكة مخوفاني !! ..
افهمني ..
امبارح كنت جنبي .. في الغنواية الجميلة
قلبك بستان وقلبي .. عصفور ساكن خميلة
وصحيت على الحقيقة .. بعد الغنوة الرقيقة
لقيتني بعيدة عنك .. والغربة مسهراني
كلمني ..
إيه رأيك يا حبيبي .. ولا انتا مش معايا
الحلم بدايته رحلة .. لكن فيه النهاية
صدقني الدنيا أجمل .. من حلم يموت ويدبل
وحتى يوم ما يصدق .. يصدق مع حد تاني
ليست هناك تعليقات:
إرسال تعليق