شجرة الياسمين
يا شجرة الياسميـــن **** يا الضاوية على الجنينة
نوارك ظاهر زيــن **** ما بين عروف وجينـة
خطفتي نظرة عينيــا **** بين ورود البستــان
انشوف فيك غير انتيا **** وفي قدك المزيــان
مع نسيم الصبحيـــة **** نجي لعندك لهفــان
نغنم ساعة هنيـــة **** بسرور و سلــــوان
عقلي ما عادشي ليـا **** راح معاك يا ياسمينـة
عقلي ما عادشي ليـا **** راح معاك يا ياسمينـة
يا شجرة الياسميــن **** يا الضاوية على الجنينة
نوارك ظاهر زيــن **** ما بين عروف وجينـة
نتأمل ديما فيـــك **** حتى تدمع عينيــــا
ابغيت نقرب ليــك **** لكن فشلو رجليــــا
قلبي متعلق بيـــك **** نبكي صبحة وعشيــة
بدموعي نسقيـــك **** باش تدومي ليــــا
ما كان اللي يجي ليك **** من غيري يا ياسمينـة
ما كان اللي يحضيـك **** من غيري يا ياسمينـة
يا شجرة الياسميــن **** يا الضاوية على الجنينة
نوارك ظاهر زيـن **** ما بين عروف وجينـة
نستنشق ريح هـواك **** معطر ما ليه مثيـــل
نبغي نسهر حـداك **** والليل يكون طويــل
غارق في نهار بهــاك **** كي نغمة واد يسيـل
رضايا يجي برضـــاك **** يشفي قلبي لعليـــل
لفراق معـــاك هلاك **** وليلي يا ياسمينـــة
لفراق معـــاك هلاك **** وليلي يالله ياسمينــــة
يا شجرة الياسميـــن **** يا الضاوية على الجنينة
نوارك ظاهر زيـــن **** ما بين عروف وجينـة
أنتي رمز العشـــاق **** وأنتي رمـز غرامـي
في كل ساعة نشتــاق **** نبغي تكوني قدامـي
ما نصبر على الفــراق **** عليك بنيت احلامــي
نظمــــي ملأ لأوراق **** نشف مداد اقلامـي
كيف اللي شاف وداق **** ما يقدر ينسى ياسمينة
كيف اللي شاف وداق **** ما يقدر ينسى ياسمينة
بقلم الشاعر / حسام ابوحمدالله
ليست هناك تعليقات:
إرسال تعليق