الصباحات 1 ****** بقلم السيدابوطاحون
********** *************
صباح الرزق والإبداع
صباح واضح ومش خدّاع
وفاكهة من هَنا الأنواع
وقلب شراع
يمد إديه علي الأوجاع
يطببها .. ويطيبها ..
بزهر لمون هوي النعناع
ويبدلها بورد مشاع
وهمسه ف ودن شموسه
ومييييت بوسه
و ورد الورد
من موزو ومن جوجو <3 <3
لأطيب جد
وخد ما ترد
ومن عروستنا في سوريا
عسل جبلي تاهت ف العد
وبكره الشام
هتاخدنا لوحدة بجد
لا تتراجع ولا تتهد
وهنخضر صحاري المجد
__________
صباح شاعر
لا هو خايف ولا خاين
ولا خايب ولا داعر
ورغم ان الطريق واعر
صباح طازج
بطعم التوت
ينبت كل يوم ويفوت
علي العصفور
يقابلوا النور
ونور الله
بديع ووقور
وماله مثيل
يشد البسمة للمكسور
- ومش لاقي -
فى همسة توت
ولا حدش يموت
م الجوع ولا م الخوف
وطول عمري
بموت ف التوت
موصيهم علي قبري
بشجرة توت
مروية بشهد النيل
وأنام فرحان
فى رحمة ربنا الرحمن
__________
ولازم كل يوم تقرا
جمال الكون
وتتملي ..
وأوعي الموهبة دي تموت
وكن بالبحر ده مجنون
ومهما يكون ..
هتتوضي بنور الله
وأحلي صلاه
ولازم كل يوم تكتب
ولا تكدب ولا تطاطي
ولا يهمك من النبوت
ولا الكداب ولا المحتال
ولا الواطي
وليه خايف ؟!
مادام عارف
بإن العمر متحدد
وإن الرزق متحدد
وإن الله هو المعطي
وهو العاطي
صباح الرزق والإبداع
صباح واضح ومش خدّاع
وفاكهة من هَنا الأنواع
وقلب شراع
يمد إديه علي الأوجاع
يطببها .. ويطيبها
بزهر لمون هوي النعناع
ويبدلها بورد مشاع
__________
موزو ( معاذ اسامة )
جوجو ( جمانة محمد )
عسل ( عسل الحسن )
كوكي (كنزي محمد )
توتي (تاليا محمود )
موكا (مليكه اسامه )
**************
#الصباحات(1)
#السيدابوطاحون
#الإخنوم
ليست هناك تعليقات:
إرسال تعليق