حياتي الزوجية/ بقلم الشاعر/مصطفى محمد عبدالمنعم

......حياتي الزوجيه..... 

حياتي الزوجيه.. علي طول زي ما هي..

مافيش فيها تغيير.. ما احلي العزوبيه..

اصحي الصبح بدري..اصلي الفجريه..

أفطر فول وفلافل..وبطاطس مقليه. 

اطلع عالشغل دغري..وأرجع بعد الضهريه..

ألاقي المدام بتاعتي..طبخالي ملوخية..

عباره عن شوية شوربه..وعليهم طشة تقليه..

ومعاهم سدر فرخه..اوحتة لحمه مشويه. .

وعليهم نص رغيف..وتبقي لقمه هنيه..

كل وبس ماتشبع..وبعديها انام شويه..

عايزاني اعمل ريجيم. .عشان حالتي الصحيه..

وقبل ما انام..اصلي الضهريه..

انام شويه واصحي..اصلي العصريه. .

ألاقي المدام تقوللي..ذاكر لعيالك شويه..

أقولها يا مدام..وانتي وراكي ايه الساعه ديه..

تقول غسيل وطبيخ كل يوم..كفايه دول عليا..

انا خلاص اتهديت..الرحمه ياناس شويه..

أقولها ماانا زيك..تعبان يا وليه..

طول النهار في شغلي..عايز ارتاح شويه..

وبعد طول جدال..كلمتها تمشي عليا..

أقول تعالوا ياعيال..نذاكر الحبه ديه..

حكم القوي عالضعيف..ربنا ياخد الست ديه..

كان مالي ومال الجواز..كانت اتعمت عنيا..

ماكنت قاعد مرتاح..وجبت لنفسي رزيه..

المهم يا احباب..وخلاصة الحكايه ديه..

مش عايز أطول عليكم..قولوا خليك شويه..

بعد ما أخلص مذاكرة..اصلي المغربيه..

أقول خلاص هارتاح..تقوللي بص عليا..

انا عايزه اروح لماما. .اقعد معاها شويه..

انا مرحتش من زمان..بقالي أسبوع وشويه..

هات كام جنيه..اخد معايا هديه..

أقولها حرام عليكي..خفي ايدك عليا..

المصاريف بقت زياده..ومش هتكفي الماهيه..

تبكي وأنزل دموعها..وتقول ياعيني عليا..

انا مكسورة الجناح..ومحدش بيحن عليا..

أليس هدومي وأنزل ..علي الجامع اصلي العشيه. .

ادعي واقول يارب..ريحني منها شويه..

ولما أرجع تقوللي..هنتعشي ايه الليله ديه..

أقولها عايزه ايه..طلباتك أوامر عليا..

تقول بيض ولبن..وحتة جبنه طريه. .

وبيفي علي لانشون..وكام زتونه مخليه. .

وحفاضه للبيبي. .وميه معدنيه..

أقولها خلاص ياهانم..كفايه دول عليا..

انا مش قاعد علي بنك..ولا بطبع نقديه. .

وهي دي حياتي..من الصبح للعشيه. .

مافيش فيها تغيير..ما احلي العزوبيه..

.....ابوزمان.....يوميات زوج مفروس